Dysgwyr Coleg Caerdydd a’r Fro yn treulio’r haf yn bod yn Greadigol

Mae dysgwyr ar gyrsiau Creadigol yng Ngholeg Caerdydd a’r Fro wedi treulio haf prysur yn cymryd rhan mewn perfformiadau byw, sioeau ac arddangosfeydd ar hyd a lled y Prifddinas-Ranbarth.

I nodi diwedd y tymor, roedd dysgwyr o bob maes o fewn cwricwlwm Creadigol eang y Coleg wedi cynnal Sioe Arddangos Diwedd Blwyddyn rhyfeddol. Roedd yn cynnwys arddangosfeydd, cerddoriaeth fyw, dawns, perfformiadau a sioe ffasiwn, dyma un o uchafbwyntiau blwyddyn academaidd CCAF bob amser.

Cynhaliodd carfan Greadigol y Barri eu harddangosfa eu hunain yn yr Oriel Gelf Ganolog, tra’r oedd dysgwyr Celf wedi mynd ati hefyd i gynnal arddangosfa dros dro yn Amgueddfa Sain Ffagan, a chynhaliodd myfyrwyr Ffasiwn sioe ffasiwn yng Nghanolfan y Mileniwm. Yn ogystal â hyn, roedd myfyrwyr Creadigol wedi cynhyrchu Llwybr Celf Tafwyl ym Mharc Bute, ac wedi perfformio yn Guys and Dolls a chynyrchiadau eraill yng Ngŵyl Theatr Awyr Agored Caerdydd 2024.

Yn wir, dewiswyd gwaith un dysgwr ar gyfer arddangosfa yn y Mall Galleries yn Llundain. Cafodd gwaith Naomi Provence, sef ‘Casgliadau’, ei ddewis gan y corff dyfarnu UAL o blith mwy na 500 o ymgeisiau ledled y DU ar gyfer yr arddangosfa ‘Origins Creatives’, sy’n arddangos talent artistig ifanc.

“Ar hyn o bryd, rydw i’n astudio Celf a Dylunio Lefel 3 yng Nghampws y Barri yma yng Ngholeg Caerdydd a’r Fro,” medd Naomi. “Rai wythnosau’n ôl, fe wnaeth y corff dyfarnu ar gyfer fy nghwrs ddewis cerflun roeddwn i wedi bod yn gweithio arno drwy gydol y flwyddyn ar gyfer ei gynnwys yn yr arddangosfa. Rydw i’n eithriadol o hapus a balch fy mod wedi cael fy newis ac rydw i’n edrych ymlaen at fynd i Lundain i weld yr arddangosfa â’m llygaid fy hun.”

Bob blwyddyn, mae CCAF yn darparu ar gyfer dros 500 o ddysgwyr ar bob math o gyrsiau Creadigol, sy’n amrywio o Gelf a Dylunio i Ddylunio Ffasiwn, Dylunio Amlgyfrwng, Dylunio Cynnyrch 3D, Cynhyrchu Ffilm a Theledu, Dylunio Graffeg, Ffotograffiaeth, Cerddoriaeth – Cynhyrchu neu Berfformio – a’r Celfyddydau Perfformio, naill ai Theatr Gerdd neu Actio. Bydd tua 50% yn mynd ymlaen i brifysgolion fel Coleg Brenhinol Cerdd a Drama Cymru, Goldsmiths, Central St Martins, y Coleg Celf Brenhinol, Ysgol Ffilm Llundain, Academi Ffilm Ravensbourne, Prifysgol Gorllewin Llundain neu brifysgolion Caerfaddon a Bryste.

Dywedodd Pennaeth Coleg Caerdydd a’r Fro, Sharon James-Evans: “Yn CCAF, rydym ni’n ymfalchïo mewn cynnig profiadau a chyfleoedd sy’n fwy na dim ond ystafell ddosbarth, ac mae holl amrywiaeth y gweithgareddau a’r perfformiadau y mae ein dysgwyr Creadigol wedi cymryd rhan ynddyn nhw’r haf hwn yn brawf o hynny.”

“Mae’r holl ddoniau sy’n cael eu harddangos, naill ai o ran gwaith celf a dylunio, ffasiwn, cerddoriaeth neu berfformio, wedi bod yn syfrdanol. Pob lwc i bob un o’n dysgwyr Creadigol – a barnu yn ôl y gwaith rydych chi’n ei gynhyrchu’n barod, mi ewch chi’n bell.”