Mae Ffion Llewellyn, myfyrwraig Safon Uwch yng Ngholeg Caerdydd a’r Fro, wedi ennill Gwobr CAVC am ei Hymrwymiad Eithriadol i’r Iaith Gymraeg.
Mae CAVC yn falch o’i dreftadaeth Gymreig a phenderfynodd greu’r wobr arbennig hon i ddathlu’r iaith Gymraeg a’i diwylliant ac i wobrwyo dysgwyr sy’n dangos eu hymrwymiad iddi. Noddir y wobr gan y Coleg Cymraeg Cenedlaethol.
Cafodd Ffion, sy’n 18 oed ac yn dod o Dŷ-du ger Casnewydd, ei dewis fel enillydd y wobr eleni am yr ymrwymiad rhagorol i’r Gymraeg y mae hi wedi’i ddangos yn ystod ei chyfnod yn y Coleg.
Ymunodd â chynllun Llysgenhadon Cymraeg CAVC i ddechrau yn 2021 ac mae bob amser wedi bod yn llawn brwdfrydedd a syniadau i godi proffil y Gymraeg ar draws y Coleg mewn ffordd hwyliog a difyr – er gwaethaf yr anawsterau a achoswyd gan y pandemig. Sefydlodd foreau coffi wythnosol ar gyfer clwb dysgwyr Cymraeg CAVC ac mae wedi cymryd yr awenau gyda’r cyfrif TikTok Dysgu Cymraeg ac wedi cymryd rhan mewn podlediadau a darllediadau lles Cymraeg fel rhan o Academi Cyfryngau Jason Mohammad y Coleg.
Mae Ffion hefyd wedi cynrychioli CAVC ar S4C, gan drafod podlediadau a faint o effaith maen nhw’n ei chael ar bobl ifanc.
“Rydw i’n teimlo’n dda iawn am ennill y Wobr Ymrwymiad Eithriadol i’r Iaith Gymraeg,” meddai Ffion. “Doeddwn i ddim yn disgwyl cael fy enwebu hyd yn oed, heb sôn am ennill.
“Bydd yn golygu llawer i fy nheulu gan eu bod nhw’n siaradwyr Cymraeg, felly mae hynny’n golygu llawer i mi hefyd.”
Mae Ffion, a aeth i ysgol Gymraeg ac sydd â theulu Cymraeg ei iaith, yn credu bod cefnogaeth CAVC i ddwyieithrwydd yn hollbwysig.
“Rydw i’n teimlo ei bod hi’n bwysig iawn bod y Coleg yn hybu’r Gymraeg,” meddai. “Yn dod o ysgol uwchradd Gymraeg roeddwn i’n meddwl y byddwn i’n teimlo ar goll braidd, yn gwybod dim ond terminoleg Gymraeg, ond rydw i wedi gallu ymuno â chlybiau Cymraeg a gwneud rhai o fy mhynciau drwy gyfrwng y Gymraeg.”
Wrth siarad am ei hamser yn CAVC a’i rhan yn y cynllun Llysgenhadon Cymraeg a chlybiau Cymraeg, dywedodd Ffion:
“Yr hyn rydw i wedi’i fwynhau fwyaf am fy amser yn y Coleg yw cymaint rydw i wedi tyfu. Rydw i wedi dysgu mwy nag y gallwn i erioed ei wneud yn unrhyw le arall.
“Rydw i wedi cael llawer o gyfleoedd i roi cynnig ar bethau newydd fel y cyfryngau a gwahanol arddulliau celf. Rydw i wedi gwneud ffrindiau newydd ac rydw i wedi dechrau clybiau ac wedi estyn allan at bobl newydd sydd eisiau siarad am les neu gerddoriaeth - mae wedi rhoi cymaint mwy o hyder i mi.”
Un cyfle a dderbyniodd Ffion yn frwd yn ystod ei chyfnod yn CAVC oedd Academi Jason Mohammad. Yn cael ei gweithredu ochr yn ochr â’r cyflwynydd radio a theledu – a chyn-fyfyriwr yn CAVC – Jason Mohammad, mae’r Academi yn rhoi cyfle i fyfyrwyr ddysgu sgiliau darlledu a chyfryngau ochr yn ochr â’u cwrs arferol.
“Un cyflawniad oedd yn arbennig iawn i mi oedd gweithio gyda Jason Mohammad yn yr Academi,” esboniodd Ffion. “Doeddwn i erioed wedi meddwl am weithio yn y cyfryngau o’r blaen, ond fe benderfynais i roi cynnig arni.
“Ers hynny rydw i wedi gwneud podlediadau, sioeau teledu a darllediadau radio – rhai ohonyn nhw’n fyw. Rydw i wedi darllen awtociw ac rydw i wedi gwneud y pethau yma yn y Gymraeg a’r Saesneg. Mae’n un o fy llwyddiannau mwyaf i yn y Coleg.”
Bwriad Ffion yw symud ymlaen i astudio Darlunio yn y brifysgol, ond mae Academi Jason Mohammad wedi agor ei llygaid hefyd i'r posibilrwydd o gael gyrfa yn y cyfryngau.
“Rydw i wastad wedi caru celf ac fe fyddwn i wrth fy modd yn cadw hynny fel rhan o fy mywyd i,” meddai. “Er hynny, ar ôl gwneud Academi Jason Mohamad, fe fyddwn i wir yn mwynhau unrhyw beth i'w wneud â'r cyfryngau; siarad cyhoeddus, podlediadau, sioeau teledu neu radio. Felly, rydw i wedi gwneud cais am gwpl o brentisiaethau cyfryngau hefyd i gael troed yn nrws y diwydiant hwnnw oherwydd rydw i wedi dod o hyd i angerdd doeddwn i erioed yn gwybod oedd gen i.
“Mae’r Coleg yn bendant wedi fy helpu i gyflawni fy nodau. Mae rhywun ar gael bob amser i siarad â nhw pan mae gennych chi unrhyw broblemau – ac mae fy nhiwtoriaid i wedi bod yn debycach i ffrindiau ac mae fy athro tiwtorial i’n hyfryd iawn.
“Ac rydw i’n meddwl, drwy wneud y clybiau, rydw i’n meddwl ei fod wedi gwneud i fwy o bobl estyn allan at bobl eraill, felly hyd yn oed os nad ydych chi eisiau estyn allan at diwtoriaid, rydych chi’n estyn allan at eich gilydd – mae’n gymuned braf i’w chael.”
Dywedodd Pennaeth Coleg Caerdydd a’r Fro, Sharon James: “Llongyfarchiadau Ffion! Yng Ngholeg Caerdydd a’r Fro rydyn ni’n dathlu’r iaith Gymraeg a’r diwylliant Cymreig ac mae gwaith Ffion yn ein helpu ni i wneud hynny wedi bod yn wych eleni.
“Rydyn ni’n falch o fod yn Gymry ac yn credu bod gan bawb yr hawl i gyfathrebu â ni a dysgu gyda ni yn y Gymraeg. Dyna pam rydyn ni mor falch o roi’r wobr yma i Ffion am ei hymrwymiad arbennig – dyma ein ffordd ni o ddathlu aelodau Teulu CAVC sydd wedi rhagori gyda’u sgiliau Cymraeg.”