Prifysgol Caerdydd a Choleg Caerdydd a'r Fro yn llofnodi cytundeb nodedig i ddatblygu talent yn niwydiannau’r dyfodol  

Mae Prifysgol Caerdydd a Choleg Caerdydd a'r Fro wedi cyhoeddi eu bod wedi llofnodi Memorandwm Cyd-ddealltwriaeth, gan nodi cam sylweddol ymlaen yn eu huchelgais gyffredin i ddatblygu Academi Technoleg Ddofn ar gyfer De Cymru.

Mae'r Academi yn fenter ranbarthol flaenllaw, wedi'i chynllunio i gryfhau safle de-ddwyrain Cymru fel lleoliad blaenllaw sy'n cefnogi gweithgynhyrchu uwch, seiber-beirianneg, peirianneg awyrofod, technolegau seiber, diwydiannau creadigol, a thwf dan arweiniad arloesedd.

Fel y partneriaid sefydlu, mae'r cydweithrediad hwn yn dod â chryfderau ategol Prifysgol Caerdydd a Choleg Caerdydd a'r Fro at ei gilydd i greu dull pwerus a chydgysylltiedig o ddatblygu sgiliau. Mae Prifysgol Caerdydd yn cynnig ymchwil, arloesedd ac arbenigedd academaidd uwch o'r radd flaenaf mewn meysydd gan gynnwys arloesedd seiber, gweithgynhyrchu uwch, diwydiannau creadigol, a pheirianneg awyrofod. Mae gan Goleg Caerdydd a'r Fro hanes diamheuol o ddarparu hyfforddiant galwedigaethol a thechnegol o ansawdd i dros 30,000 o ddysgwyr bob blwyddyn ac mae wedi meithrin cysylltiadau cryf â diwydiant. Bydd yr arbenigedd cyfunol hwn yn darparu llwybr di-dor o addysg i gyflogaeth, gan arfogi dysgwyr â'r wybodaeth ddamcaniaethol a'r sgiliau ymarferol sydd eu hangen i lwyddo mewn sectorau twf uchel.

Mae cefnogaeth i ddatblygu sgiliau yn cael ei chydnabod yn eang fel rhywbeth hanfodol i sbarduno twf economaidd a ffyniant ledled de-ddwyrain Cymru. Mae busnesau ac unigolion fwyfwy angen mynediad syml at gyfleoedd hyfforddi hyblyg, o ansawdd ac amrywiol gan wahanol ddarparwyr. Bydd yr Academi yn rhoi’r sgiliau gwerth uchel sydd eu hangen ar ddysgwyr i ffynnu yn niwydiannau’r dyfodol, gan agor llwybrau i yrfaoedd gwerth chweil â chyflog da. Drwy ddatblygu ffrwd gydlynol a chryf o dalent leol, wedi'i halinio â sectorau blaenoriaeth a chyfleoedd twf yn y dyfodol, bydd yr Academi hefyd yn cefnogi twf busnes, entrepreneuriaeth, yn denu buddsoddiad mewnol, ac yn cryfhau cystadleurwydd y rhanbarth, gan ddarparu manteision economaidd hirdymor i'r gymuned ehangach.

Bydd y fenter hon yn cefnogi cyflawni strategaeth economaidd y rhanbarth a'i huchelgeisiau ar gyfer datblygu clwstwr a chyfleoedd arloesi ehangach. Bydd yn sbarduno twf ar draws sectorau allweddol, gan gynnwys gweithgynhyrchu uwch, awyrofod, lled-ddargludyddion, diwydiannau digidol a chreadigol, ac amddiffyn a diogelwch, ac yn cryfhau gallu de-ddwyrain Cymru i ddenu buddsoddiad mewnol a sicrhau cyllid cenedlaethol.

Bydd y bartneriaeth gychwynnol yn gweithio'n agos gyda rhanddeiliaid allweddol gan gynnwys Prifddinas-Ranbarth Caerdydd, Llywodraeth Cymru, Medr, darparwyr addysg drydyddol, a phartneriaid yn y diwydiant i sicrhau dull cydlynol ac effeithiol. Bydd hefyd yn gweithredu fel catalydd ar gyfer cydweithio ehangach â sefydliadau addysg uwch ac addysg bellach lleol, busnesau a sefydliadau'r sector cyhoeddus i gyd-ddatblygu'r genhadaeth a helpu i wireddu gweledigaeth hirdymor a rennir ar gyfer sgiliau a thwf economaidd.

Dyma a ddywedodd yr Athro Wendy Larner, Llywydd ac Is-Ganghellor Prifysgol Caerdydd: “Rydym yn hynod falch o fod yn rhan o’r fenter hon gyda Choleg Caerdydd a’r Fro. Mae'n adlewyrchu ein hymrwymiad cyffredin i adeiladu cronfa dalent gryfach, mwy cynhwysol, gwydn, a pharod ar gyfer y dyfodol i ysgogi economi de-ddwyrain Cymru.

“Rydym yn creu cyfleoedd i ddysgwyr a busnesau fel ei gilydd ac yn cryfhau gallu ein rhanbarth i gystadlu ar y llwyfan byd-eang.”

Ychwanegodd Sharon James-Evans, Pennaeth Coleg Caerdydd a'r Fro: “Rydym wrth ein bodd yn partneru â Phrifysgol Caerdydd ar y fenter bwysig hon i ddiwallu anghenion sgiliau esblygol sectorau blaenoriaeth gwerth uchel ledled de Cymru a thu hwnt. Gyda'n gilydd, byddwn yn creu llwybrau clir ac ystyrlon sy'n arwain at yrfaoedd mewn diwydiannau twf allweddol.

“Drwy gyfuno ein harbenigedd, ein mewnwelediad i'r diwydiant a'n hanes cryf o gydweithio ym meysydd y llywodraeth, busnes ac addysg, bydd y bartneriaeth hon yn cefnogi cynhyrchiant a thwf wrth agor cyfleoedd go iawn i bobl ledled Cymru – nawr ac yn y dyfodol.”

Ar ôl llofnodi'r Memorandwm Cyd-ddealltwriaeth, bydd y partneriaid sefydlu yn dechrau gweithio ar Academi Technoleg Ddofn De Cymru. Bydd y gwaith hwn yn blaenoriaethu cyd-greu cynhwysol a chyfranogiad ehangach i yrru datblygiad rhaglenni arloesol a fydd yn hybu ffyniant i'n dysgwyr, busnesau a dinasyddion ar gyfer cenedlaethau'r dyfodol.