Cyflwyniad i Electroneg Lled-ddargludyddion Cyfansawdd

Mae lled-ddargludyddion cyfansawdd yn ddeunyddiau angenrheidiol ar gyfer technolegau modern a newydd megis 5G, ceir heb yrrwr, y Rhyngrwyd Pethau (IoT) a Deallusrwydd Artiffisial (AI). Mae ganddynt hefyd ran allweddol i'w chwarae trwy helpu i fynd i'r afael â rhai o heriau'r byd modern, gan gynnwys cynaliadwyedd a'r agenda sero net.

Mae'n bosib eich bod yn fwy cyfarwydd gyda Silicon, sydd wedi bod yn asgwrn cefn y chwyldro electroneg o'r 1960au. Fel elfen unigol o'r tabl cyfnodol, mae gan Silicon set gyfyngedig o nodweddion. Mae gan led-ddargludyddion cyfansawdd nodweddion sy'n rhagori ar rai Silicon, gan alluogi technolegau newydd ac arloesol a dyfeisiadau megis:

• pŵer (electroneg pŵer ar gyfer cerbydau trydan)
• cyflymder (amledd radio ar gyfer 5G a RADAR)
• golau (ffotoneg ar gyfer cyfathrebiadau ffibr optig)

RHAN 1 (deunyddiau e-ddysgu)

Erbyn diwedd Rhan 1 y cwrs byddwch yn gallu:

• egluro electroneg lled-ddargludyddion - beth ydyw ac ym mhle y mae i'w ganfod mewn bywyd o ddydd i ddydd
• disgrifio, yn syml, beth yw deunyddiau lled-ddargludyddion, gan gynnwys y gwahaniaeth rhwng deunyddiau lled-ddargludyddion elfennol (silicon) a chyfansawdd
• disgrifio, ar lefel sylfaenol, sut mae cylchedau electroneg lled-ddargludyddion yn cael eu creu
• deall, mewn ffordd syml, cymwysiadau lled-ddargludyddion a pha led-ddargludyddion allai fod yn briodol, yn dibynnu ystyriaethau perfformiad a chost
• gwerthfawrogi'r cymwysiadau presennol ar gyfer y farchnad, a rhai'r dyfodol, ar gyfer electroneg lled-ddargludyddion
• egluro sut mae electroneg lled-ddargludyddion cyfansawdd yn cyfrannu at y gymdeithas, at ddatblygu technolegau newydd, a helpu i fynd i'r afael â heriau'r byd modern

RHAN 2 (sesiwn mewn person)

Erbyn diwedd Rhan 2 y cwrs, byddwch wedi cael y cyfle i gyfranogi yn y gweithgareddau canlynol (gyda chefnogaeth a ddarperir gan y tiwtor a'r hwylusydd):

Gweithgareddau ar ddeuodau - byddwch yn gwneud unionwr ac yn archwilio nodweddion DC-IV deuodau er mwyn deall gweithrediad syml deuodau

• dysgu ffurfiau nodweddion DC-IV deuodau
• dysgu sut mae trawsnewidiad o AC i DC yn gweithio (yn ei ffurf fwyaf syml)

Gweithgaredd ar wneuthuriad micro - gan ganolbwyntio ar y cysyniad o ddefnyddio graddfa, byddwch yn defnyddio eitemau megis microsgop, darn 10c, a waffer silicon i:

• ddeall graddfa anhygoel transistorau modern
• deall sut mae picsel ar ffonau yn cynhyrchu lliw drwy ficropicselau
• mae yna hefyd ail ran i'r gweithgaredd hwn sy'n edrych ar feicro-wneuthuriad dyfeisiadau aml-haen drwy ddefnyddio tryloywluniau

Gweithgaredd ar dransistorau - byddwch yn archwilio nodweddion DC-IV Transistor Cyswllt Deuben (BJT) a Thransistor Cyswllt Effaith Maes (JFET) a phenderfynu mwyafswm cerrynt y BJT a'r JFET ar fias a roddir, er mwyn:

• deall gweithrediad sylfaenol y ddau dransistor
• dysgu ffurfiau nodweddion DC-IV y ddau dransistor
• ystyried cymwyseddau y ddau dransistor

Gweithgaredd ar ddadleniad golau a chelloedd solar - byddwch yn defnyddio LEDau, ffotodeuodau a chelloedd solar i:

• deall gweithrediad sylfaenol LED, ffotodeuodau, a chelloedd solar
• deall sut mae gwahanol ddyfeisiadau / deunyddiau yn gallu cynhyrchu / adnabod gwahanol donfeddi o olau
• deall effaith y sbectrwm solar ar weithrediad cell solar

RHAN 1 (deunyddiau e-ddysgu)

Unwaith bydd eich archeb wedi'i phrosesu, byddwch yn cael mynediad at y deunyddiau e-ddysgu. Bydd angen i chi gwblhau'r deunyddiau e-ddysgu cyn eich sesiwn mewn-person (h.y. Rhan 2 o'r cwrs). Gellir gwneud y cynnwys e-ddysgu yn eich amser eich hun, a bydd yn cymryd tua. 3.5 awr i'w gwblhau.

Bydd y cynnwys e-ddysgu yn cael ei gyflwyno trwy amrywiaeth o weithgareddau ar-lein a rhyngweithiol megis fideos byrion ac ymarferion profi-eich-gwybodaeth.
Bydd gennych fynediad i'r deunyddiau e-ddysgu hyd at fis ar ôl eich sesiwn mewn-person.

Does dim elfen fyw i Ran 1 ond mae yna fwrdd trafod lle gallwch gyflwyno cwestiynau i'r tiwtor ac eraill ar y cwrs. Bydd y cwrs yn cael ei gyflwyno drwy lwyfan dysgu rhithiol y Brifysgol, Learning Central. Bydd eich manylion mewngofnodi unigol yn cael eu he-bostio atoch cyn gynted ag y bydd eich archeb wedi'i phrosesu.

Bydd Tystysgrif Cwblhau CPD yn cael ei gyflwyno i ddysgwyr sy'n cyflawni 70% neu fwy yn y prawf ar ddiwedd y cwrs. Mae hwn yn brawf aml-ddewis.

RHAN 2 (sesiwn mewn person)

Bydd y sesiwn ymarferol hwn yn darparu cyfle gwerthfawr ar gyfer:

• profiad dysgu lle byddwch yn gallu gweld technoleg lled-ddargludyddion ar waith
• gofyn cwestiynau i arbenigwr, a chwrdd â gweithwyr proffesiynol eraill sy'n gweithio yn y sector
• rhoi amser i greu cysylltiadau rhwng y deunydd e-ddysgu a chymwyseddau ymarferol, bywyd go iawn
• cael gwybodaeth y gallwch ei rhoi ar waith yn syth yn eich gweithle
• amgylchedd cefnogol lle byddwch yn gweithio mewn grwpiau bychain ar garwsél o weithgareddau, yn cael ei hwyluso gan arweinydd y sesiwn a'r hwylusydd (yn ôl y gofyn)
  

Nid oes gan y cwrs hwn unrhyw ofynion mynediad ffurfiol. Lluniwyd y cwrs hwn ar gyfer unrhyw rai o blith y canlynol: Y rhai sy’n gweithio yn y sector lled-ddargludyddion ac sy’n dymuno gwella’u gwybodaeth am electroneg lled-ddargludyddion cyfansawdd. Y rhai sy’n dymuno ailhyfforddi ar gyfer y sector lled-ddargludyddion/lled-ddargludyddion cyfansawdd. Y rhai sy’n cefnogi’r sector – er enghraifft, cyflenwyr y sector. Gweithwyr proffesiynol ar ddechrau neu ar ganol eu gyrfaoedd sy’n dymuno gwella neu newid eu gyrfaoedd. Graddedigion diweddar sy’n dymuno meddu ar y sgiliau perthnasol ar gyfer ymuno â’r sector. Rhaid i’r ymgeiswyr fod yn 18+ oed a rhaid iddynt fyw neu weithio ym Mhrifddinas-Ranbarth Caerdydd, sy’n cynnwys Pen-y-bont ar Ogwr, Blaenau Gwent, Caerffili, Caerdydd, Merthyr Tudful, Sir Fynwy, Casnewydd, Rhondda Cynon Taf, Torfaen a Bro Morgannwg.

• Mae'r Coleg yn croesawu cyswllt â rhieni / gwarcheidwaid myfyrwyr sy'n iau na 18 oed.

• Mae cefnogaeth ychwanegol ar gael i fyfyrwyr sydd ag anableddau ac anawsterau dysgu.

• Mae Coleg Caerdydd a'r Fro wedi ymrwymo i gynhwysiant ac mae'n gwerthfawrogi amrywiaeth. Rydym yn benderfynol o hybu cyfleoedd cyfartal a thrin pawb yn deg a gyda pharch.

• Mae Coleg Caerdydd a'r Fro yn cadw'r hawl i wneud newidiadau i'r cwrs hwn heb rybudd ymlaen llaw.

• Gall ffioedd cyrsiau newid. Cadarnheir eich ffi cyn ymrestru.

• Mae pob cwrs yn fanwl gywir adeg uwchlwytho neu argraffu'r deunydd hwn.

• Dim ond os oes niferoedd digonol y cynhelir y cyrsiau.

• Sylwer, os byddwch yn dewis tri chwrs neu fwy, efallai y cewch eich cyfeirio i gael apwyntiad gyrfaoedd i ddechrau. Nid yw hyn yn berthnasol i ddewisiadau Safon Uwch na TGAU.