CELTA (Tystysgrif addysgu Saesneg i siaradwyr ieithoedd eraill)

Mae cwrs CELTA Saesneg Caergrawnt yn arwain at gymhwyster a gydnabyddir yn rhyngwladol ar gyfer y rheiny sy'n dymuno mentro i'r proffesiwn addysgu iaith Saesneg i oedolion, ac mae'n aml yn cael ei ystyried yn ofyniad sylfaenol ar gyfer cyflogaeth mewn sefydliadau addysgu ieithoedd ledled y byd. Mae wedi'i achredu yn y DU gan y Swyddfa Rheoleiddio Cymwysterau ac Arholiadau (Ofqual) ar Lefel 5 y Fframwaith Cymwysterau Rheoleiddedig (RQF). 

Mae gennym ddau gwrs ac mae'r oriau mynychu fel a ganlyn:

• Cwrs Dysgu Cyfunol Rhan Amser CELTA (mis Tachwedd at y Ebrill): Mae'r cwrs hwn yn cael ei gynnal o 4 Tachwedd 2024 hyd at 7 Ebrill 2025. Mae'n cyfuno dysgu ac addysgu wyneb yn wyneb ac ar-lein. Mae'r ymarfer addysgu wedi'i rannu'n ddau gyfnod o dair awr sydd naill ai ar-lein neu wyneb yn wyneb. Mae hyn yn rhoi profiad i chi o'r ddau ddull. Mae ymarfer addysgu, adborth a chynllunio gwersi ar brynhawn Llun o 13.00 tan 18.00. Mae unrhyw fewnbwn ychwanegol rhwng 18.00-19.00.  Gellir cyrchu'r 30 uned mewnbwn ar-lein ar unrhyw adeg, a gellir eu cwblhau ar adeg sydd fwyaf cyfleus i chi.

• Cwrs 4 wythnos wyneb yn wyneb CELTA (mis Mehefin i fis Gorffennaf): Dydd Llun i ddydd Gwener 8.30 tan 17.00.

Yn ogystal â'r amserlen sydd wedi'i threfnu, mae disgwyl bod yr ymgeiswyr yn ymroi o leiaf 120 o oriau ar gyfer y paratoadau gofynnol cyn y cwrs, darllen, ymchwil, ysgrifennu aseiniadau, paratoi gwersi, cadw cofnodion, tiwtorialau ac arsylwi athrawon profiadol.

Sut fyddaf yn dysgu?

Mae natur y cwrs yn ymarferol iawn. Mae wedi ei rannu yn sesiynau mewnbwn ac ymarfer addysgu. Bydd y sesiynau mewnbwn yn canolbwyntio ar theori ac egwyddorion sylfaenol addysgu a dysgu iaith. Mae'r sesiynau ymarfer addysgu sy'n cael eu goruchwylio yn gyfle ichi roi'r theori ar waith.

Cewch arweiniad a goruchwyliaeth wrth gynllunio eich gwersi yn ogystal ag adborth ysgrifenedig a llafar ar eich addysgu. Yn ystod y cwrs, byddwch hefyd yn cael y cyfle i arsylwi athrawon profiadol, a bydd disgwyl ichi gwblhau pedwar aseiniad ysgrifenedig a fydd yn eich helpu i ddatblygu eich dealltwriaeth o addysgu Saesneg.

Sut fyddaf yn cal fy asesu?

Mae Asesu Saesneg Prifysgol Caergrawnt wedi cymeradwyo rhaglen cwrs, staffio a chyfleusterau pob canolfan sy'n cynnig cyrsiau sy'n arwain at y dystysgrif CELTA. Mae'r cwrs yn cael ei asesu yn ôl meini prawf, yn barhaus ac yn integredig. Nid oes arholiad terfynol ac nid yw presenoldeb ar y cwrs yn gwarantu eich bod am ei gwblhau'n llwyddiannus. Bydd y dystysgrif yn cael ei dyfarnu i ymgeiswyr sy'n cwblhau pob un o ofynion y cwrs ac yn bodloni pob maen prawf asesu.

Ar ddechrau'r cwrs, bydd yr ymgeiswyr yn cael gwybodaeth fanwl ynghylch meini prawf asesiadau ymarfer addysgu ac aseiniadau ysgrifenedig y cwrs, a chyfeirir at y meini prawf hyn drwy gydol y cwrs. Mae ymgeiswyr yn cael cymorth ac arweiniad priodol ac yn cael gwybod am eu cynnydd yn ystod y cwrs drwy sylwebaeth ysgrifenedig ar eu hymarfer addysgu ac aseiniadau ysgrifenedig, a thrwy sesiynau tiwtorial.

Dwy elfen yr asesiadau CELTA yw:

1. Ymarfer addysgu

   Erbyn diwedd y chwe awr o ymarfer addysgu a asesir, sy'n digwydd dros nifer o sesiynau, dylai ymgeiswyr fod wedi cyflawni pob un o'r meini prawf ymarfer addysgu.

2. Aseiniadau ysgrifenedig

Mae pedwar aseiniad ysgrifenedig i gyd, yn canolbwyntio ar yr agweddau canlynol:

• y dysgwr
• systemau'r iaith Saesneg
• dadansoddi deunyddiau dysgu / addysgu
• myfyrio ar arsylwi gwersi, ymarfer addysgu ac adnabod y pwyntiau addysgu

Mae'r aseiniadau hyn yn amrywio o ran hyd ac arddull ond ni ddylai cyfanswm geiriau'r gwaith ysgrifenedig a asesir fod yn llai na 3,000. Gellir ailgyflwyno unrhyw aseiniad ysgrifenedig sy'n methu â bodloni'r meini prawf asesu a nodwyd, ar un achlysur yn unig. Mae'r Ymarfer Addysgu a'r Aseiniadau Ysgrifenedig yn cael eu hasesu'n fewnol gan diwtoriaid y cwrs.  Mae pob cwrs hefyd yn cael ei safoni'n allanol gan asesydd CELTA sy'n ymweld â'r ganolfan, yn arholi portffolios asesu yr ymgeiswyr ac yn arsylwi’r ymarfer addysgu.

Mae'n rhaid i ymgeiswyr:

• fod yn 18 oed neu'n hŷn, er ein bod yn argymell yn gyffredinol y dylai ymgeiswyr fod yn 20 oed neu'n hŷn;
• bod ag ymwybyddiaeth o iaith a gallu mewn Saesneg ysgrifenedig a llafar, a fydd yn eu galluogi i ymgymryd â'r cwrs a pharatoi tuag at addysgu ystod o lefelau gwahanol (y lefel a argymhellir yw C2 ar y CEFR);
• bod â chyfarpar cyfrifiadurol addas, cysylltiad band eang sefydlog â lled band/ lwfans data digonol a lefel llythrennedd digidol a fydd yn eu galluogi i ddeall gofynion technegol eu cwrs yn hawdd;
• fel gofyniad lleiaf, bod â safon addysg sy'n gyfatebol i'r hyn sy'n ofynnol er mwyn mynd ymlaen i addysg uwch. Gall y ganolfan ddefnyddio ei disgresiwn i dderbyn ymgeiswyr nad ydynt â chymhwyster ffurfiol ar y lefel hon, os yw sgrinio'n awgrymu eu bod yn debygol o gwblhau'r cwrs yn llwyddiannus.

Yn ogystal, rhaid i’r ganolfan sicrhau ei hun fod:

• ymgeiswyr yn meddu ar y potensial i ddatblygu'r sgiliau angenrheidiol i fod yn athrawon effeithiol ac i gwblhau'r aseiniadau ysgrifenedig ac asesiad ymarfer addysgu'n llwyddiannus;
• y cwrs yn addas ar gyfer ymgeiswyr o ran eu profiad, cefndir a chynlluniau gyrfaol;
• ymgeiswyr yn gallu mynychu'r cwrs cyfan

Ffi Cwrs: £1,690.00

Mae'r ffioedd yn cynnwys yr holl addysgu, deunyddiau, ffotogopïau, mynediad at gyfleusterau'r coleg fel y Ganolfan Ddysgu, a ffi arholiad CELTA Saesneg Prifysgol Caergrawnt.

Rhaid talu 25% o'r ffioedd wrth gofrestru. Mae cofrestru fel arfer yn digwydd o fewn pythefnos i'r cyfweliad. Gellir talu'r ffioedd sy'n weddill mewn rhandaliadau. Ni fydd ad-daliadau llawn yn cael eu rhoi fel arfer.

Sut ydw i'n gwneud cais?

Cliciwch ar yr eicon 'Gwneud cais nawr' ar frig y tudalen hwn, a chwblhewch y ffurflen gais ar-lein. Os ydych yn dymuno gwneud cwrs CELTA ar adeg wahanol, cliciwch ar yr eicon 'Newid' ar frig y tudalen er mwyn sicrhau eich bod yn cwblhau'r ffurflen CELTA gywir.

Hefyd, e-bostiwch y dogfennau cais canlynol at Diwtor y Cwrs, Simon Smith ssmith@cavc.ac.uk:

• CV gyda manylion llawn eich cymwysterau;
• Datganiad personol tua 300-350 gair yn amlinellu eich rhesymau dros fod eisiau dilyn y cwrs a pham eich bod yn meddwl y byddwch yn athro/athrawes Saesng i Siaradwyr Ieithoedd Eraill da. Byddai manylion ynghylch eich swydd bresennol, profiad gwaith blaenorol, gwybodaeth o ieithoedd eraill ac unrhyw brofiad o addysgu sydd gennych, yn ogystal â gwybodaeth ynglŷn â'ch cynlluniau gyrfa yn y dyfodol, yn ddefnyddiol er mwyn inni asesu pa mor addas ydych chi ar gyfer y cwrs.
• Copi wedi ei sganio o'ch cymhwyster uchaf, e.e. tystysgrif gradd

  Rydym yn argymell eich bod yn gwneud cais yn gynnar er mwyn rhoi gwell cyfle ichi o sicrhau lle ar eich cwrs dewis cyntaf. Mae lleoedd yn cael eu cynnig i ymgeiswyr addas ar sail y cyntaf i'r felin.

  Beth sy'n digwydd nesaf?

  Bydd Tiwtor Cwrs CELTA yn asesu eich cais er mwyn gwirio eich bod yn bodloni gofynion mynediad y cwrs. Unwaith ein bod wedi asesu eich cais, mae 2 canlyniad posibl:

• Os bydd eich cais yn llwyddiannus, byddwch yn cael eich gwahodd i gael cyfweliad yn y sesiwn nesaf fydd ar gael.
• Os nad ydych yn bodloni un neu fwy o'r gofynion mynediad, byddwch yn derbyn e-bost yn egluro pam nad ydy'r cwrs yn addas ichi ar yr adeg hon.

Beth sy'n digwydd mewn cyfweliad?

Bydd ymgeiswyr ond yn cael eu derbyn ar y cwrs ar ôl cwblhau tasg cyn cyfweliad, a dod am gyfweliad. Bydd y sesiwn gyfweld yn cynnwys y canlynol:

• cyflwyniad cryno i'r cwrs;
• arddangosiad micro-addysgu a thasg adborth grŵp gydag ymgeiswyr eraill;
• tasg iaith ysgrifenedig
• cyfweliad unigol gyda thiwtor CELTA.

Bydd canlyniad y sesiwn gyfweld yn cael ei anfon atoch chi drwy e-bost o fewn pum diwrnod gwaith. Mae penderfyniad y ganolfan yn derfynol.

Am ragor o wybodaeth ynglŷn â'r cwrs CELTA ac addysgu iaith Saesneg, ewch i wefan Saesneg Caergrawnt yn http://www.cambridgeenglish.org/teaching-english/teaching-qualifications/celta/

Am ystod o fideos a gweminarau am CELTA, edrychwch ar sianel Youtube Saesneg Caergrawnt yma: https://www.youtube.com/user/cambridgeenglishtv/search?query=celta

Pam ddylwn i ddilyn y cwrs CELTA yng Ngholeg Caerdydd a'r Fro?

Ni yw'r Ganolfan CELTA Saesneg Caergrawnt hynaf yng Nghymru. Rydym wedi bod yn cynnal cyrsiau CELTA yn y coleg ers 2005 ac wedi hyfforddi dros 400 o athrawon iaith Saesneg yn llwyddiannus. Mae ein tiwtoriaid yn athrawon a hyfforddwyr profiadol; mae dau ohonynt hefyd yn aseswyr CELTA Saesneg Caergrawnt. Os ydych yn dilyn y cwrs yma, byddwch yn cael mynediad at yr holl gyfleusterau a gwasanaethau sydd ond yn cael eu cynnig gan golegau mawr.

Mae gennyf gymhwyster addysgu ac ychydig o brofiad addysgu eisoes. A fyddaf yn cael fy esgusodi o rai cyfraniadau a / neu ymarferion addysgu?

Nid oes achrediad ar gyfer dysgu neu brofiad blaenorol i ymgeiswyr sy'n dymuno dilyn y cwrs hwn. Mae'n rhaid i'r holl ymgeiswyr fynychu a chwblhau'r cwrs cyfan er mwyn cael y dyfarniad.

Beth yw'r posibilrwydd fy mod i'n mynd i lwyddo?

Mae graddau ein canolfan yn adlewyrchu, neu'n rhagori ar gymaryddion cenedlaethol a rhyngwladol.

Cewch weld yr ystadegau graddau diweddaraf yma: http://gradestatistics.cambridgeenglish.org/2018/celta.html

A fyddaf yn medru cael swydd addysgu gyda CELTA yn unig, neu a oes angen cymwysterau addysgu eraill arna i hefyd?

Byddwch yn gallu dod o hyd i swyddi addysgu EFL ac ESOL yn y DU a thramor gyda thystysgrif CELTA. Fodd bynnag, efallai y byddwch angen cymhwyster ychwanegol, fel TAR, DELTA Saesneg Caergrawnt neu MA mewn Ieithyddiaeth Gymhwysol / TESOL, os ydych am geisio swyddi mwy parhaol ac / neu uwch, yn dibynnu ar ba sector addysg rydych ynddo. Mae ymgeiswyr fel arfer yn dechrau gyda'r CELTA ac yn mynd ymlaen i geisio un neu fwy o'r cymwysterau eraill yn nes ymlaen yn eu gyrfa.

A oes digonedd o gyfleoedd gwaith? A fyddaf yn medru dod o hyd i waith llawn-amser?

Mae digonedd o swyddi rhan-amser, dros do a llawn-amser ar gael dramor, ac fe ddylech allu dod o hyd i waith yn weddol hawdd mewn ystod o wledydd. Mae dod o hyd i swyddi parhaol, llawn-amser yn y DU yn anoddach. Mae ymgeiswyr fel arfer yn dod o hyd i swyddi tymhorol yn ystod yr haf a / neu waith sy'n cael ei dalu fesul awr yn ystod y flwyddyn academaidd yn gyntaf, ac maent yn raddol yn gwneud mwy o oriau nes bod cyfleoedd parhaol yn codi.

Ble mae eich graddedigion CELTA diweddar wedi dod o hyd i waith?

Mae rhai wedi mynd ymlaen i weithio mewn sefydliadau preifat a chyhoeddus dramor, yn Ne America, Affrica, Asia ac Ewrop. Mae eraill wedi dod o hyd i waith yn lleol mewn ysgolion iaith preifat, colegau addysg bellach, addysg oedolion cymunedol, prifysgolion ac elusennau. Mae rhai graddedigion wedi penderfynu mynd ymlaen i wneud cwrs TAR mewn addysg gynradd neu uwchradd. Mae nifer bychan wedi aros yn eu swyddi blaenorol. Ychydig iawn o ymgeiswyr sy'n dal i chwilio am swyddi neu leoliadau addysg.

A fyddaf yn dod o hyd i waith gyda thystysgrif CELTA ond ddim gradd?

Mae graddedigion CELTA blaenorol nad oedd ganddynt radd israddedig wedi dod o hyd i waith mewn ysgolion iaith preifat ac mewn addysg bellach yn y DU a thramor. Fodd bynnag, heb radd, efallai y bydd yn anodd ichi ddod o hyd i waith mewn addysg uwch neu sefydliad yn y DU sydd wedi ei gymeradwyo gan y Cyngor Prydeinig. Mae rhai gwledydd yn disgwyl bod gan athrawon radd, gan gynnwys Gwlad Groeg a Sbaen.

Rydw i wedi trefnu i fynd ar wythnos o wyliau yn ystod y cwrs. A oes modd imi golli rhai o’r sesiynau?

Mae Saesneg Caergrawnt yn gofyn bod ymgeiswyr yn mynychu 100% o'r cwrs. Mae'n rhaid eich bod yn dal i fyny gydag unrhyw sesiwn sy'n cael ei golli. Os oes rhaid ichi golli un neu ddwy o'r sesiynau yn ystod y cwrs, bydd angen ichi drafod hyn gyda'ch tiwtor CELTA yn ystod y cyfweliad. Gwnawn ein gorau i fod yn hyblyg o fewn canllawiau Saesneg Caergrawnt. Fodd bynnag, mae rhai amgylchiadau lle nad yw hyn yn bosibl, e.e. yn ystod cwrs dwys llawn-amser neu ar ddechrau cwrs rhan-amser.

Nid oes gennyf gyfrifiadur personol adref. A fydd hyn yn broblem?

Gallwch archebu amser i ddefnyddio'r cyfrifiaduron yng Nghanolfan Dysgu ein Coleg. Fodd bynnag, mi fydd angen mynediad i gyfrifiadur a chysylltiad y we tu allan i’r coleg arnoch chi.

Mae gennyf anabledd / gyflwr iechyd. A fyddaf yn cael cymorth ychwanegol a / neu help yn ystod fy nghwrs?

Os oes gennych unrhyw fath o anabledd, neu os oes gennych chi gyflwr iechyd a all effeithio ar eich cynnydd ar y cwrs, mae angen ichi roi gwybod i ni am hyn cyn gynted ag y bo modd, e.e. yn ystod y cyfweliad, fel ein bod yn medru trefnu ichi gael eich asesu gan un o'n harbenigwyr cymorth dysgu a fydd yn trefnu bod y cymorth angenrheidiol yn barod ar eich cyfer, cyn i'r cwrs ddechrau. Bydd rhoi gwybod i ni yn gynnar yn ein helpu i sicrhau bod addasiadau rhesymol yn cael eu gwneud fel bod gennych bob siawns o lwyddo ar y cwrs.

A oes unrhyw ostyngiadau, grantiau neu fwrsarïau ar gael ar gyfer ymgeiswyr CELTA?

Os ydych wedi colli eich swydd yn ddiweddar, mae cyllid REACT ar gael ichi. Gweler ReAct funding | Careers Wales (gov.wales) am fanylion. Efallai byddwch hefyd yn medru ceisio Benthyciad Datblygu Gyrfa gan eich banc. Nid yw'r coleg yn medru cynnig gostyngiad i unrhyw ymgeisydd sy'n gwneud cais am y cwrs CELTA.

A fydd angen imi brynu llyfrau cyn neu yn ystod y cwrs, a pha adnoddau eraill sydd ar gael?

Mae holl lawlyfrau'r cwrs a'r deunyddiau atodol EFL / ESOL ar gael yng Nghanolfan Dysgu'r coleg, a gallwch eu benthyg yn ystod y cwrs. Fodd bynnag, efallai y byddwch eisiau prynu eich copi eich hun o argraffiad diweddaraf Learning Teaching gan Jim Scrievener, gan fod ymgeiswyr yn ei weld yn ddefnyddiol iawn. Efallai bydd gwefan a thiwtorialau fideo Jo Gakonga yn ddefnyddiol iawn ichi cyn, yn ystod ac ar ôl gorffen eich cwrs CELTA. Mae Jo yn un o JCAs CELTA. Gallwch ddod o hyd i'w gwefan yma: https://www.elt-training.com/

Byddwch yn cael benthyg y llyfrau cwrs y byddwch eu hangen yn ystod eich sesiynau ymarfer addysgu. Gallwch wneud ffotogopïau ar gyfer eich myfyrwyr Ymarfer Addysgu yn y coleg, ac maent yn cael eu cynnwys yn ffi'r cwrs. Mae holl gyfleusterau ac adnoddau'r coleg y bydd angen ichi eu defnyddio yn ystod eich cwrs, hefyd ar gael ichi am ddim.

• Mae'r Coleg yn croesawu cyswllt â rhieni / gwarcheidwaid myfyrwyr sy'n iau na 18 oed.

• Mae cefnogaeth ychwanegol ar gael i fyfyrwyr sydd ag anableddau ac anawsterau dysgu.

• Mae Coleg Caerdydd a'r Fro wedi ymrwymo i gynhwysiant ac mae'n gwerthfawrogi amrywiaeth. Rydym yn benderfynol o hybu cyfleoedd cyfartal a thrin pawb yn deg a gyda pharch.

• Mae Coleg Caerdydd a'r Fro yn cadw'r hawl i wneud newidiadau i'r cwrs hwn heb rybudd ymlaen llaw.

• Gall ffioedd cyrsiau newid. Cadarnheir eich ffi cyn ymrestru.

• Mae pob cwrs yn fanwl gywir adeg uwchlwytho neu argraffu'r deunydd hwn.

• Dim ond os oes niferoedd digonol y cynhelir y cyrsiau.

• Sylwer, os byddwch yn dewis tri chwrs neu fwy, efallai y cewch eich cyfeirio i gael apwyntiad gyrfaoedd i ddechrau. Nid yw hyn yn berthnasol i ddewisiadau Safon Uwch na TGAU.